نسب الريد والهم

نسب الريد والهم


انا كنت مصر علي انو الريد والهم اخوان
وانا لسه مصر علي انو الريد والهم اخوان
الريد ود بت الشوق واللهفة
اللهفة البت عم الاشجان
والهم اكبر اولاد الغم
الغم معروف ابو الاحزان
اشجان الريد واحزان الهم
في حسبة كل انساب الدم اخوان
نفس الخوة مذاقم واحدنفس الطعم
ومذاجم واحد في كل الالوان
وانا لسه مصر علي انو الريد والهم اخوان
الخوة البين الريد والهم ما جات من محض فراغ
ولااوهام
جات بي امشاج من لحم ودم
بي قصة حب كانت اسيرة
يوم بت الشوق ادوها الغم
والغيرة مرة قلبها غيرة
قالت حرم كضاب الغم كان يقدر يزوج بت غيرة
والحزن حلف بالدمعة طلاق
لو ما الغم عرس بت الشوق
كان يملا عقاب الريدة فراق
والغم كان راجلا فقري وشين
بس كان زولا دغري وواضح
ما زول وشين
والشوق عارف كيفن بتو
بي حب الغم كانت اسيرة
قال احسن يلم بين القلبين يرتاح من سيرة ها السيرة
في ليلة اختلفت عن غيرة
الغم زفوهو للسمحة عريس
في اجمل موكب زفة وسيرة
فرحو الاطفال اتلمت كل الحلة هناك
نسوان ورجال
والحفلة بدت
قام غنا الفال
والسمحة رمت للشوق شبال
والخوف طربان
وكان اول يوم تدخل افراح بيت الاحزان
كانت ايام زي اجمل عيد
اتلم الغم علي بت الشوق
والغيرة هناك في نار تقيد
وعاشو الاتنين زي احلي اتنين
بكرو بي ولد سموهو الريد
والريد قرب بين القلبين
كل ما الاغدار كانت بتصيب
اها بت الشوق في يوم عادي
زي عادت كل نسوان الحلة
لفحة توبا وقالت تمرق تدي الجارات في الحي طلة
مشت الاه تكفر ليها
هاك يا حق الله وبق الله
يابت الشوق هوي يا الفالحة ماك عارفة
جدك في الحسبة دا خالي لزم
وحبوبة عمة بت خالت عمك
جابت خالت بت حبوبتي
وجات اللهفة الجابت امك
وجات الحسرة الجابتني
ودي شربكة طويلة عليك يابتي
وشجرة كبيرة
في غمرة ها تلك السيرة جات الغيرة
وكان اول يوم يتلاقو الغيرة وبت الشوق
كان بت الشوق بالجد خايفة
لكن الغيرة بي خبث شديد
وبي بسمة وش كانت زايفة
قدرت تقلع منها خوفة
وغمزن وهمسن نسوان الجن في القصة البينن معروفة
يابت الشوق ما يهمك عادي
كل زولا قسمتو بيشوفا
والاقدار المكتوبة علينا برنضابا ونرضخ لي ظروفا
وانا هسي الفات ما واجعني
الفات اوراقو بقت مكشوفة
واجعني الغم الما مهتم شايفاهو
شايف غيرك شوفة
قبال ما تواصل في كلاما
النار انطلقت في جوفا
قامت وما شايفا القداما
ما بين موجوعة وملهوفة
وقالت للغم بس طلقني
ما دايرة معاك دنيا اشوفا
يامرة مالك
بس طلقني
كدي ياخ اهدي
بس طلقني
ياخ استهدي
بس طلقني بس طلقني
ياخ طلقانا
مادام بتشككي في ريدي
الريدة معاك تب حرمانا
اتفارقو بت الشوق والغم
واتبدد اقوي نشيج من دم
وامتن بنيان ريد اتهدم
والغيرة هناك نصبت صيدة
ووقع في شبك الغيرة الغم
وجابولم ود سموهو الهم
كدا صبح الهم والريد اخوان
ما من ام واحدة بس نفس الاب
من داك الحين كدا
صبح الهم والريد اخوان
من نفس الاب
من داك الحين لحدي الان ما اتفارقو تب
بقي مافيش ريد علي وجه الارض
من غير احزان وهموم وتعب
وماسي وصد
وعوازل تبقي قصادك سد
وتتوه من فرقة ودروب تنسد
وبدون ما تتضوق في الريد احزان
ما بتعرف طعم الريد الجد
بقي في العشاق مفهوم راسخ
من كدا هموم الريد وجد ريد منساب لابعد حد
وانا لامن كنت مصر جدا
ومصمم جد علي انو الريدوالهم اخوان
والنسب البيناتم ممتد
ما كان من محض فراغ وهمي
كان بي امشاج من لحم ودم
الخوة البين الريد والهم