شكراً جزيلاً يامطر ...

شكراً جزيلاً يامطر ...


شكلااً جزيلاً يامطر

هبن كتاتيح الوجع

طششت في سكك الودر

شايفاك جوايا رهاب رهاب

انا وانت قاعدين فوق حجر

نتونس الشوق الرهيف

ويضوي جوانا القمر

وقدرك امر

وامرك أمر

من كوني ابلعو بي سكات

والذكرى سرطان في دماي

بتزاحمك جوه العروق

ولسع زفيرك في جواي

كاتماو رئاي حاميه المروق

وانا مابفوق

وإيدك طويله على الشروق

كفتها

وحمر خدوده من الضلام

حصل إنفصام

وبقيت شخوص

ماسكين سكاكين النويح

وبقطعوني حتت حتت

شكراً جزيلاً يامطر

الليل سدل

وسمعت دل

تاريو جواي طرشق حنينك وإنبهل

وياربي هل ؟

هل إنت رضيانلي العذاب ؟

هل كلما افتحلي باب للرجعه

تقفل الف باب ؟

هل تستحق الريده بعد صفاها

تتبدل خراب ؟

هل كل حليفات الخلود

تبقالي في الاخر سراب ؟

هلات كتارات بندهن

مابنتهن

جواي بفورن يلهلهن

كبد السكات جوايا بالخوف إنهرا

كلما تجملك الحروف

القى الحواس الصادقة جواي تنهرا

ودايماً تقولها كان مرا

يوم تنضميهو بدون نفس

وريني كيفن تلقي ليك من دون هواو

في الدنيا حس

شكراً جزيلاً يامطر

ليه إندفق فوقنا الغرام

مادام هو مابسقي القليب

يلبس وشلرقاهو الدموع

وانا خايجه بي رجلين شقاي

بعفص قليبي واهردو

وانا نفسي منك اجردو

وانا نفسي طيرات الفرح

لويقربنلي يغردو

وانا نفسي نرجع زي زمان

عينك تحمر للفراق

يرجع يخاف

ماسكني ماشين في طريق

وارواحنا دايماً في إئتلاف

وانا نفسي رغم الاختلاف

نفضل نوادد في بعض

قد يصلح الود إختلاف

شكراً جزيلاً ياجفاف

شكراً جزيلاً يامطر

مازمجرن بعدك حواس

بحصل تنافر في الشبه

كان حصل الجوف إلتماس

ملموسة فيك كل النوازع الفي جواك

وانا فيك اكيد مافت ساي

قاعد هواي

قادر عليك

رغم المسافات والبعاد

شكل التضاد

لسع بتاور فيك حنين

بعلني جواك لسه في

ومابنتفي

وكل ذنبي إنك ماوفي

وشكراً جزيلاً يامطر

حرشني شوقك ما اجيك

بنوت هواك بتشابهن

والريده ماكلمه بحبك والسلام

وري البنات تاريخ هواي

كان يفهمن معنى الغرام

ماتجفل العشرة وتفوت

وانا دايره اموت

انا كيف اعيش من دون اناي

وانفاسي واحساسي وغناي

بنزف وماكملت دماي

وسط الخلوق لكن براي

بضحك وكت مايزيد بكاي

شكراً جزيلاً يا ....

شكراً جزيلاً يامطر

بكره الكفوف بتعادلن

وبخاف عليك

كف المآسي يرجحك

ويوم إمتحانات الصدق

ماتلقى غيري ينجحك

وبرشحك

للماضي اصدقما يكون

وماتخاف علي

لوقلنا إنك حاسي بي

انا لسه بي نفس الصدق

والريد جواي رغم إستواو لساتو ني

وفي نص هضاليم الجنون

انا لسه بندهلك تعال

رغم إني مادايراك تجي

وخلصان جواي الإحتمال

وانا تاني مابقدر عليك

شكراً إليك

خليتني اهواك بي صدق

شكراً لأنك ياهواي

خليتني انساك بي صدق

شكراً جزيلاً يامطر





ايمان متوكل

1.9.2011