تباشير الفرح طلت

تباشير الفرح طلت

على طرف الأماني الغبشه هزاني الحنين للجاي
مسيخ طعم المواجع الفات بنوح ذكره
قبيحة مبشتنه وعكره
تفاصيل العلي ممكونة بالصبر الصبح لولاي
ودي سنين العمر مرت
مرور من خطوه ممحوقه
ومهدودات رجول المشية دايرة الينحني يسوقه
وطفح كيل العذاب سنوات
منو العاش في جواي غناي
منو الكبكب حروفي ومات
حروف في حلقي مخنوقة
نبض قلبك المآسي دموع
ولاممنوع
سكات الحق
إذا عود الوطن لين ومابنشق
فشق راسك
إذا غالطت إحساسك
منو الخاتك تحت جزمه
وعز الأزمة قام داسك
تكح لشنو
إذا رئة العشم فاضيه وهواك مابزفر العافيه
وتفاصيل البلد مرضانه
ماشه على الموات حافيه
ومرق ضو من مكامن الضلمه
شفتك حلمه
آياربي القلوب صافيه
ووعد صدق القصيد بنقاس بفد كلمه
تهز جوف الحقيقة المره
وهادي المره
ياريت تبقى لي كافيه
وإذا نقص الحنين جواي
فقبل جاي
واسند حيل غناي
واحرس حروفك تبقى قافيه
بريدك ياخلاصة الريد وكت ماتبقى متكافيه

ايمان متوكل