فرصة تانيـــــــــــة

فرصة تانية


محتاجين نجرب في الحب فرصة تانية



كفاية عمرنا بيجري و أصلو عمرنا ثانية



....................................................................





محتاجين نقرب للبيناتنا أكتر



و نفهم يوم بعضنا قبل البينا تكبر



و بي بسمة و مودة كل كبيرة تصغر



عاوزين فرصة تانية يا ريدي المُقدّر



..................................................................



براحة بهداوة بتهون القواسي



ونعرف وين خلافنا و أسباب المآسي



حنوصل يا حبيبي لي بر المراسي



و ترجع أحلى دنيا يا ريدي الأساسي



.......................................................



تعال نقعد برانا و نناقش المشاكل



بدون ما تعلي صوتك تعال و الباقي ساهل



نفكر في حياتنا أصلو العمر راحل



حنوصل لي نتيجة و يبقى زمنا عادل



........................................................



بريدك و انت عارف و عارفك لي رايد



و ماضي الريدة بينا مؤكد بكرة عايد



نعيش أيام سعيدة و يبقى فرحنا زايد



عاوزين فرصة تانية معانا القلب شاهد









محمود الجيلي