maxcode
Admin
عدد المساهمات : 41
تاريخ التسجيل : 07/12/2011
 |  موضوع: نقاط الزير  الإثنين يناير 09, 2012 7:26 am | |
| نقاط الزير
نقاط الزير
ولحاف مهرود
ماتامي سرير
... والحوش وسخان
بلاعة البيت
جركانة الزيت
كسار الطوب
فردة مركوب
شجرة لالوب
شافع سرحان
مليان بالجير
ويقود النار
باقة الكركار
دخان الصاج
صوت الحجاج
باب النفاج
أولاد عمك
راقدين بي جاي
مهدودين حيل
شايلين الليل
احلام عشمان
ريحة البلدات
ضرعات جنيات
ميراث ابوات
وعصاية زان
صوت الأذان
موية الابريق
شوف لينا طريق
ختينا الني
ختينا الضيق
ادينا وساع
وكلاب الحي
ماكنات ومناع
مانعات الضي
والحال بطال
ادينا ريال
راجيانا عيال
وحبال في حبال
ماليها حدود
وطريق مسدود
والجيب مقدود
والود ميرود
حق الدكتور
والصف والدور
وابوهو معاش
ماف حاجه بلاش
سيد الدكان
ممنوع الدين
جاز البابور
سلك اللماع
طعميه فطور
ورسوم وهموم
وغبار وسموم
ام الأولاد
ماضاقت النوم
ولاحتي رقاد
تعبانه خلاص
ملت البرميل
ونهاره غسيل
حفظت البت
سورة الإخلاص
بي وجع الراس
رقدت بالتوب
ماقالت الروب
كوراك الديك
مستوره هديك
جهزت الشاي
ربك هاديك
مابفكك ساي
لابد إديك
من بعد الضيق
وانا كنت غريق
مالاقي القش
ولا حتي شهيق
ياالوشو قمر
مابدسو الغيم
وانا حبي قديم
وتتاوق البت
تملاني كلام
وعيونه عيون
ماليات الكون
بي اجمل لون
مرشوح جواي
ياهمس الريد
ياسر مغناي
بقراك في النم
سامعك شاشاي
عطرك ينشم ب
بحرك وداي
الناس بالناس
والكل للفوق
بعدوني بعيد
من المعشوق
غرباوي بقيت
رسموها شروق
وانا بين إتنين
بالظن مخنوق
بين إنك لي
ام إنك فوق
عسمني الريد
ياست الزوق
ياضل مفروش
جوات الحوش
مقشوش ونضيف
من قول الزيف
مرشوش بي موية ريد وحنان
والبن في النار
وتهب ريحتك
وانا راسي يدوش
متقريف ليك
والمطره بدت
في داك الحوش
المامعروش
سافر ياناس
انا القاو كيف
رسلت كتير
أشواق وسلام
وحروفي تطير
مرسالي حمام
وأقول لابد
يبعت لابد
لكنو هناك
لا بصد لا برد
شلهتني معاو
لي آخر حد
حدادي هواك
مدادي المد
ياخ مشتاق ليك
طمني علي
لو كت ماجاي
رسل عينيك
فجأة النباه
وانا ليلي طويل
متعشي جراح
لملمت اساي
جابلدت الآه
شهدت نجوم
وحدت الله
وأخيرآ عاد
كان شايلو بعاد
وأخيرآ عاد
وانا عاد ياناس
افراحي كحل
والريد مرواد
وجريت القاو
سابقني هواو
ولسوء الحظ
لاحظت اللون
ما لون العين
وإحساس ممحوق
مافيهو حنين
زي المسحور
او طاقشاو عين
والدنيا تدور
وقلب مكسور
ومراية الظن
ما بتعكس نور
محمود الجيلي | |
|
ناصر مدثر
عضو جديد
عدد المساهمات : 3
تاريخ التسجيل : 20/07/2014
| | موضوع: رد: نقاط الزير الأحد يوليو 20, 2014 6:27 pm | |
| ياسلاااااااااااااااااااااام ياااااااا الله يامحمود يسلمو الايادي | |
|
ناصر مدثر
عضو جديد
عدد المساهمات : 3
تاريخ التسجيل : 20/07/2014
| | موضوع: رد: نقاط الزير الثلاثاء يوليو 22, 2014 4:34 am | |
| بس معليش محمود عايز اعلق علي غياب اشعار المبدعة نهي كباشي ياريت لو تيبقي ليها ملف في شعراء ريحة البن صدقني هي الجنزبيل للبن | |
|
اليومية
