دروب الدنيا الكتيرة فيها ناس مافي زولا عارفا
تعصر في حشاها جمر المظالم ما لاقيا الينصفا
لاقيت في دربي مرة خريج دمعاتو جارية يكفكفا
سالتو عن سبب الاسى وحالتو الاسيفة ومؤسفة
اتنحنح وعدى العبرة من زورو وحزنو ما اختفى
قام يخاطب ذاتو و يشتكي من نفسو ويوصفا
* * * * *
صدري مخنوق بالكلام والدنيا حولي مزيفة
مليانة كذب ونفاق وانعدم فيها الود وقلّ الوفا
في حياتي شايل الآمي وهم غيري وما كفى
عترت فوق الهموم وقعت وقدح احلامي انكفأ
اتألمت لميت حطام امالي ووجعي باين ما خفا
عتبت قمت سندت حيلي على الاماني الزائفة
فردت طولي وقلت ياربي آخر عترة اصادفا
اكيد بكرة تتحسن احوالي ومن الفقر ارقد قفا
* * * * * *
اتاريهو يا دنيا الامنك يادوبو بالالام احتفى
الواحد من كتر الحوامة على الشغل نامن حفا
لعن الظروف ضرب الكفوف عض ايدو وقال حفا
وناس يابختهم فوق غناهم الكريم ليهم اصطفا
قبل التخرج محفوظ مكانم ونحنا لينا الارصفا
* * * * * *
راجيك يادنبا تبسمي لي من غير حتى ملاطفة
تنور بسمتك سكة حياتي تضويها لي وتكشفا
تبعثي فيني الامل وعزيمة بيها ايامي اقدر اكيفا
واعيش في لحظة تفاؤل وانشراح حالة صفا
اشهق واملا رئتي بعبير ازهارك الفواح شفا
واسترجع الماضي الجميل ياريتو الامي يخففا
* * * * *
زمان كان القراية تعزك والناس بيك متشرفة
بهمة تنجح تشيل سيفك شهادة مهنتك العارفا
بيها تتقدم تنال حظك بكفاءة وجدارة ومعرفة
لاواسطة لامحسوبية لاتزكية حزبية لاعجرفة
الأحد أكتوبر 08, 2017 10:30 am من طرف TigerAd
اليومية
موضوع: آلآم الخريجين 
