ممكـــــون

ممكون





** مدخـــــل **

يامالكاني من قبال أعرف اسمك
ويا ساكناني من جواي امرقك كيف
يا الشلعت من جواك معاني الخوف
ويا الخوفتي فيني الماعرف جنبك شنو التحريف
وياطارداني من جواي كحر الصيف
وات شايفاني بتقطر عرق جنبك
وانتي حداي إيديك باااارده
لاتضليل ولاتكييف
وياسايباني اجري وراك من كم قيف ولي كم قيف
نويت أنساك
عسي الاحوال تمش بالعكس
وصيفك فيني يبقي خريف
وكل ما أقول افك دربك
بشوف صورتك خيال وحلم
بتقول لي وراي ما أظن بتلقي وليف****

** نـــــص **

ضليت بين قلبك والواطه
بتشابا وخايف تنسيني
ضايع بين شعرك وعتمه ليل
غمضته وحابسك في عيني
عطشان محتار من وين أشرب
أشرب من دمك!
ولا النيل؟ إن كان دا النيل مابيرويني
فارقت الضحكه وضليتا
وكرهت حياتي ومليتا
أسرتني وحرقت اوطاني
هجمتني بغفله وحبيتا
شافتني في يوم وانا بتغزل
في خيالا وجهرا لاقيتا
فكرتني بخونا وطردتني
من دارها ومغصوب خليتا
حاولت أقول لها ياقلبي
في غيابك صورتك ناديتا
بس هي ومن غير تتعقل
بس هي ومن غير تتفهم
جرحتني...وانا ماني أذيتا
ادتني الشارع وانا جاهل
قتلتني......وانا روحي اديتا
وتعبت بفتش لي قلبي
ولقيتو بجرحها إتوسم
ولقيتو بيشهق ويدندن
مع إنو بينزف وبتالم
مرات القاه مين غير يشعر
قاعد هو براهو وبتكلم
مسكين يادابو قدر يهوي
معزور يادابو عرف يعشق
بس ياريت منها يتعلم
وأنا قلبي حنيين وطيباني
لابشيل جواه ولابكتم
ولابعرف يغدر مهما كان
مابقتل عمد....ولا بظلم
بس هسي هو أصبح وحداني
في يوم إتحير وناداني
قال لي لو ممكن بس أسأل
داير أعرف مين فينا الجاني؟
وانا كت بتقطع من جوه
من نارو وسمو اللي غلاني
انا شايف وماقادر أتصرف
بصرخ وانا قافل آذاني
وكت بجري وواقف في مكاني
في الضل بس نارك حارقاني
حا أضمد جرحي إذا بقدر
في قلبي الدم يرجع تاني
ماليهو زمن بنزف ممكوووون
حيعود الدم لي شرياني
وان كت ضليت انا من قلبك
وان كنتي القاصده وناسياني
وان كنت انا ضايع في شعرك
وان كان الليل إتبناني
وان كت عطشان محتار أشرب
لا الدم الفاسد برويني
ولاصوتك أصبح بشجيني
ولا همسك حايعيدو حنيني
لاعيونك دمعها أغراني
أنا ماشي وسايبك بي راحتك
راحل
وانا جاهل عنواني
بس دايرك تعرفي ياحلوه
إنو الأيام بتلف تاني
وانا ممكن اموت وانا بتعذب
بس ليك محال
محال أرجع تاني****ضليت بين قلبك والواطه***



عمار الزين