سـبـتــــك ...

سبتك






سبتك وفاكر الهم خلاني
لقيتو فراقك أكبر هم
وانا محتاج لي هما تاني

رغم الخوف الزارعاه فيني
برضو بحسك زي حاباني

قايم وقاعد _فاكر اسمك
نايم وصاحي_شايل رسمك

وانتي هناك دوام ناسياني

انا فكرت اسيبك
وانسي سنين الهم
وامسح أحزاني

لقيت نسيانك كبر شوقي
وزاد جريانك في شرياني

بقيت مشتاق لي
صوتك
وهمسك
(ورفعه حاجبك لما بغازلك
وجد حنيت ارجعلك تاني)

أصلي سراب من غيرك انتي
وياني أسيرك
وانتي ملاكي ونور وجداني

وكنت بفكر أرجع تاني
بس حسيتك لامن ارجع
لي حاتقولي:

مين دا القال برجعلك تاني
مين دا القال بهديك حناني

تمشي وترجع كدا بي راحتك؟
ما حا أعاني؟

تجرح قلبي
وتقتل حبي
ولسه بتعشم نرجع تاني؟

وكنت بفكر كيف ارضيها
كل آهاتا الجبتها كيف امحيها
وكنت بفكر امشي عليها

وقاعد افكر:
فجأه اشوف عينيها يضون
جايه قريبه
واكذب عيني وادعك فيها

افتح اشوف ماكانت وصلت
وقلبي الطار من فرحتو يرقص
فجاه يسيبني ويجري عليها

ومديت ايدي اسلم
ويااااريتني_لو مامديتها

اتمنيت تفضل ماسكاه
ولو مستعجله تمشي معاها

عشان من تاني اجيها بلهفه
واقول لها:
إيدي معاك عاوزاها؟

اسيبها معاك لومحتاجاها
واكون فرحان بي شيلتك ليها
لما شذاك يحوم وياها

لما تكون ع طوول حاساك
لما تكوني بشوق ضاماها

لماتحسي الرجفه الفيها
وتعرفي انك إنتي وراه

لما تغازلك وتلمس خدك
وتنسي الفرقه الكان عايشاها

إيدي سعيده معاك_
وقبلك ياما ضناني شقاها

وتاني اجيك واقول لك
إيدي معاك عاوزاها؟

واقعد ابكي واضاري دموعي
أصلو الفرحه بجد ماليها

واسمع صوتها

اسمع صوتها

واسمع صوتها برقه يقول_:
(حبيبي:دموعك اوعي اشوفها
واوعي بدوني تعيد ذكراها)

وتاني أعيدها وابكي قصادها
وتقعد تضحك_وتعرف مكري
وتمسح دمعي الشايلو هواها

واقول لها _جد بي صوت مخنووق
داير اقول لك_داير أحكيلك

فجأه كلامي يطير_يتبخر
وقالت لي_خلاص فاهماها

ناوي تقول لي:
بحبك جدا
بريدك خالص
وعايز الرد؟

انا ردي عليك....



ياسجمان الوقت إتأخر
وعندك امانه الناس راجياها

فجأه افتح والقي الكان
دا مجرد حلمه
ودقات قلبي الناس سامعاها

إتمنيت لوكان ماقمت
وافضل عايش حلمي معاها

وكانت دايره تقول الكلمه
العشت سنين مستني صداها
وماااا أحلاها

حتي دموعي بتبكي عليها
عشان في الحلمه دي حست إيدها
وكل عطور الدنيا معاها

إتمنت احلامها تشوفها
وتلمس إيدها_تعوم ف شذاها

وكل نصيبي أخدتو في حلمي
وماطمعان القاهو معاها

بس ياريت الغاليه تسامح
وتعرف إني بموت ف هواها

ومااااا أحلاها

وسبتك وفاكر الهم خلاني
لقيتو فراقك أكبر هم

وانا مامحتاج لي هما تاني


وراجع ليك..................٦/٠٨




عمار الزين