بـــت بتعـقـــــد

بت بتعقد






دخلت فيك يازول بالقوه
واوعي تقاوم ريدا بتخسر
جاتك جاهزه_بنيه فتوه
تعافر فيك لامن تجتاحك
وتعلن أسرها ليك من جوه

دخلت وكانت قاصده عيونك
ماهماها الصد من ناسك
وقوه راسك_وعتمه كونك

بت بالضحكه تبيد أحزانك
ولما تنادي عليك بي لهفه
تطش من راسك كل اوزانك
بت ياناس والله تعقد
وبدعه ربنا في عينيها
يمين بتزيد يازول إيمانك

دخلت وكانت فيك شايفاها
لسه مسوده جوه قليبك
ولسه عيونك ماناسياها
بس جات دغري_ولاهماها
وعارفه بإنها لازم توصل
وإنك لازم يوم تهواها

دخلت ورسمت فيها ملامحك
خلت عينيك فيها تشوفك
وتقدر تفرز
بين التغلط فيها عيونك
وبين التغلط فيك عينيها
وتجي تتعذر ليك وتسامحك

بت تهواك وتحارب فوقك
مابترضاها النسمه تصيبك
ومابتتقبل شوق غير شوقك
همها بس إنك تبقالها
وتدفن حنها جوه عروقك

بت موزونه قوافي قوافي
تحرق فيك كل المانافع
وفيك تبنيلا بيوت ومرافي
تمرق منك كل أحزانك
وتجلب ليك افراح من مافي
بت عينيها وطن علشانك
وكل الناس باقيالها منافي

بت في آخر لحظه تطولك
تعرف كيف تملاك حنيه
وتزرع ريدها وترجي هطولك
مابتهم_لو صيفك طول
وشمسك حرقت فيها شتولك
زوله صبوووره وجد بتريدك
وواثقه بتجني في يوم محصولك


______بت بتعقد___






عمار الزين