maxcode
Admin
عدد المساهمات : 41
تاريخ التسجيل : 07/12/2011
 |  موضوع: دي محبوبتي ...  الجمعة ديسمبر 16, 2011 4:02 pm | |
| دي محبوبتي
عز العطشه والريق النشف تسقينا
جبرة حيل
أظنها و الوصف ما شالا
هي العين البتروي النيل
طبعا" فيها ما لا قاني
نبل الخيل
عزه و سمته حس عينيها
بى إيديها
تسلخ من سمانا الليل
دي محبوبتي الرست شاشاي
وشرفة شاي مسيده فوق دعاش الهيل
حجر الزاويه في الكعبه الحجيجا الفال
ترس البهجه لى الكدر البدفق سيل
هي جبرة حيل
دي محبوبتي البهاها بعم
تقدل في العروق تم تم
بى هين السعاده الغضه تبدا الكيل
وكت الجته ضاقت بينا شرعت روحا مية ميل
نجقلب في حماها نسوح
نتكل عن ضهر بسماتا هم الدنيا قدر الساحه
تتصدر تجضي الشيل
تهطل غنيه
شالت بيها سحب الدهشه في الزمن المعدل ميل
تتلقانا ديوان هجسه
عز الغربه رفقة
و هسه
ما مندسه
شبعت الفقر منديل
هي جبرة حيل
دي محبوبتي البتنفض من جباهنا الحر
ونستبشر مجيها
متل شروق العيد
وانا الجاهل القلد هدماتو نام من بدري كان تصبح
طالت ليلة التيسوعه
ما أذن بلاك بالصحو فد أذان
ولا هبهب علي زي ريح صباكي الريد
رجيناك و الزمن شحتافه توور كل بنيات المدن جوانا
نادنك
تاهن في دروب المويه يوم بالطاقه شافنك
شمس لفت شعاع جنحيها في القمره
وقصت كبدة الباراها بالدوبيت
حبسناك يا بلد في بيت قصيد ملهوف أكان تطرا
بنية الضي
حبابك في العصب تربال يهز البال يحتحت منو بركاوي الغناوي على رقع سمرا
بنية ضي بتسكني كل أحاسيس الخطاوي الهاديه في قدلة مغاربنا
وتطربنا رؤاكي تزيين الصفحات على يات من كتاب نقرا
يا مرشومه في وش السعد غره
قبالك ما كان الأمل بنسك
ولا كان الأرض خدرا
قبال طلتك عطشان
بي جلد العمر كشك
لا هو المكسي لا عريان
ولا في عضمو بتمسك
مسكتي الشتا من الروح
بعد ودعتو سوق الطير
ربيتي العزم تاتايه
لامن أمنوهو السير
قهرتي من الأماني الصافيه غول الشك
مسلسله بيك شيبات الحزن من راسنا قامن خير
فما همانا وانتي معانا جبرة حيل
أكان ربت علينا فتر سنين و دنين
واكان رارت رواكيب المقدر شر
فما زال الوجود عندك
مأمن من عواصف الحرقه غارز كم هلب في البر
دي محبوبتي البتزفر در
دي رجاحة الوزن بى الكل
هي طلة طيفا عز الكتمه
عالم فل
أباريو كان يقطر وصلو صورة فكره
مستعجل اباري الفكره
لامن ابقا صابق الضل
حين ألفاها بتصقع كهارب شوق
وامرق زي فرس ممشوق
مجروح فوق قصيدو الحي
لجامو اللهفه
ينزف جرحو في عز الضلمه الضي
دي محبوتي البتقعد فوق
وتفتل خيت سناها علي
هي بين الناس منافيه الزي
دي محبوبتي المأمنه نص دواير الشوف
من لاقيتا
يادابو البصر انتما كل الدنيا لبست ري
أظنها كاينه معنى الذات
قدر تتوارى أشتاق لي
ما بتنتما
مهما رحا في رملة دروبا القول
ولا بمسك عروق القافيه لو تنزف صفاتا الكي
دي محبوبتي البتقعد فوق وتدفق من رؤاها علي جبرة حيل
أهي العين البتروي النيل
عزه وسمته حس عينيها
بى إيديها تسلخ من سمانا الليل
دي محبوبتي الرست شاشاي
وشرفة شاي
مسييده فوق دعاش الهيل
دي محبوبتي
هتان حمد النيل
3/2011م
| |
|
اليومية
