الدنيا فرقتنا والقدر شتت اواصرنا
سعينا وراء الرزق من اجلو سافرنا
لبلاد بعيدة عن الوطن اغراب صرنا
باسمك ياوطن غنينا وهتفنا و كم ثرنا
وكل ما تمر لحظة جميلة بيك تفكرنا
زهجنا خلاص من الغربة ونفد صبرنا
وعشمنا في باكر على احزانا ينصرنا
يفوت سبب الوجعة الكان بظلمو قاهرنا
كبرنا صحيح الا ما شاخت مشاعرنا
الحنين ما مجرد خيال في الكرى يزورنا
الحنية صارت خيط بجزع الوطن يأصرنا
نلف وندور حولو وبكل قواهو يجررنا
وفي الاخر يتم خيط الصبر ابينا ام درنا
وهمس الحنين جوانا للوطن بالعودة يأمرنا
ونعود ليهو فرحانين كالاطفال مهما كبرنا
وبحرارة لهيب الشوق في حضنو يحجرنا
وبالحنان الكان عهدناه زمان فيهو يغمرنا
ولو شاء القدر بالاكراه من اسر حبو تحررنا
نكون هايمين في بحر الزمن تبحر بواخرنا
ما عارفين وين ومتين ترسو مواخرنا
هل تتوه في عتمة فضاء الكون؟
تمخر بدون مرسى ،
والقلوب تقسى ،
والحنان ننسا ،
ونلعن في العلن ناسا
بكل نتانة وخسة
باعو البلد خلسة ،
وما خلو لينا مكان فيهو نندسا
من تعب السنين نرتاح ونتمسى
وكل ما نسال كيف البلد هسة؟
يجينا جواب انو الامور لسة!
الأحد أكتوبر 08, 2017 10:30 am من طرف TigerAd
اليومية
موضوع: همس الحنين 
