جاتني مرّة رسالة من واحدة شابتني فيها لبوسة
وفي كل لحظة تظهر لي اقرِّب وايدي تابا تدوسة
قلت اكيد دي احلى بسبوسة وفي عسل مغموسة
جاتني عبر الاثير مبعوثة من ناس ساس يسوسا
لو بس نجرِّب ونهبشها تنهش في العظام سوسة
بصراحة كدا انا كنت قايلها من الاخير جاسوسة
لانهم بالجد ما خلو زول ما علمو العواسة يعوسا
وانا شنو البوديني اتلقى المحن واساسق اكوسا
قلت بالاول اتحرى واسال عنها بخطة مدروسة
صادفت من صحابا صديق اكد لي انها مأنوسة
وفي الفيس هناك قريت مقالاتا وعبرا ودروسا
لقيتا كتّابة التقول بجنون القلم عديل ممسوسة
كلامها يعبر عن دواخل بعشق الكتابة مهووسة
بتلهب العواطف بعبارات تكاد تكون محسوسة
حنونة في الزمن المكشرنابو عاضي ضروسه
خلوني اتشبب واوصف محاسنا الفيها مغروسة
بشوشة ماها عبوسة تستاهل ع الجبين بوسة
زولة بخيتة مامنحوسة وماها الشقية ومتعوسة
رايسة برايها ما مريوسة وفي الكلام هموسة
متحشمة ومحتشمة وفي داخل الخجل محبوسة
هميمة و متأنية وكيوسة بعين الكريم محروسة
امانة عليك يا السمحة وين كنتي مننا مدسوسة؟
ياريت عقارب الزمن ترجع تلف وتدور معكوسة
عشان اجيك في بيتكم اتقدم اجتبيكي ليئ عروسة
واعيد معاك كل سنيني المضت خلتني في حوسة
alnawrany
الأحد أكتوبر 08, 2017 10:30 am من طرف TigerAd
اليومية
موضوع: جاسوسة وبمحاسنا الفيها مغروسة 
