انا حـاسبه ليك

ضاقت علي
كل الحسابات المعاك
شريت دفاتر الريد وراك
لخبت ريدي مع العذاب
قت ليا أجردي ها الحساب
ومشيت وماناوي الأياب
ضاقت علي وأنا حاسبة ليك
كم مرة قت لي مابفوت
بحرس دواخلك وابني لي جواك بيوت
أنا أصلي مخلوق ليك براك
وبدون هواك
بشرب سموم همي وبموت
ضاقت علي وأنا لسه بحسب في شخابيت الغرام
كم ضحكة إتشطبت كضب
كم آهه مكتوبه في دواخل إحساسي بي خط إنهزام
كم حاجة مرت دون حساب لاقت معاي رغم المزلات إحترام
وأنا حاسبه ليك أنك كتبت بدون وعي
همك تعبيها الدفاتر وتنتهي
وأنا حاسبه ليك
الوجعة حقها منسرق
والدمعة رغم نزوله لسع في الحلق
والجوف برغم سكونو بالخوف منحرق
وإنت البراك سيد الحكم لامن تقرر نفترق
ماتجوط حساب الريدة ساي
وكل الحساب عندك فرق
وأنا حاسبه ليك
كم مرة وصيتك علي
قلت ليكا ماتسيبني بوراك
سكك الهوان مابتتمشي
قت ليكا أعمل أي شي
وافضل معاك
وأنا ماملاك
شان يومي تهرد في حشاي وأنا ما أئن
شان يومي توئد في بنات أفكاري لين قربت أجن
شان يومي أتقريف مجيك ولامن تفوت أنا ما أحن
وأنا ما أظن
أنسى الوعود
الكنت حاسه بتخلفه
وحلفتك أصدقني الكلام
يازول مسربل في الخداع
زي كل مرة بطمنك
رغم الحسابات العليك
أنا عافية ليك