رفاعـــــــــــــــــــــــــه

كم من سائس
وكم من رائد
و كم من قائد وكم من عالم
ياها رفاعه أساس و معالم
و ياها رفاعه شموخ وجلال
شعلة نور بالعز مرفوعه
ضوت أرض الوطن الحالم
التعليم والخير في ربوعا
دكو ظلام الجهل العارم
نحنا شعارنا العلم الرفعه
ونحنا شعارنا سلام ومكارم
و للعادانا سيوف ونبال
و ياها رفاعه شموخ وجلال

. . . . .

رفاعه عروس حافاها الخضره
و فوق النيل مسنوده جمال
في تاريخ العزه قديمه
طلت وسط العفه هلال
في السودان معروفه رفاعه
رفعه أبيه فخار إجلال
واقفه بقلب الدنيا مسله
أهدت لى الأوطان أجيال
صافيه البلد الباقيه الدره
وفي سودانا مناره وغره
من ما قامت قامت حره
حره و قبل الإسقلال
و ياها رفاعه شموخ وجلال

. . . . .

ناسا حنان طيبين وعزاز
لبسو بياض الكرم الدافق
عمو الكون تشريف وانجاز
شدو جواد الفخر السابق
كانو بكل تأكيد إعجاز
شوف البدري اتسامى عزيمه
زاد المرأه مكان وإعزاز
كسر قيد الجهل المدقع
وللتعليم إمتدا مجال
و ياها رفاعه شموخ وجلال

. . . . .

في الميدان أولادك يمه
كانو أسود يتلافو النار
رويانين بالطبع الحامي
واقفين ضد الذل ثوار
كم تتسطر بيهم بهجه
نصر وتطور نور وعمار
السمحين لى كل متعشم
من اجدادنا زمان أحرار
فينا الصوفي الزاهد الدنيا
يسوق الليل تهليل وأذكار
فينا القائد وفينا الجندي
وفينا شجاعه صمود وإصرار
وكت الحاره سيوفنا تشقق
نضرب عين الموت إعصار
ما بنهاب غير رب العزه
مستورين تأديب ووقار
لا بنتراجع لا بنتهزا
وما بتونينا صعاب وأهوال
و ياها رفاعه شموخ وجلال

. . . . .

نحنا أولادك يمه شجاعه
أفردي إيدك وأبشري يمه
بتك سارت دامي يراعا
شرفك باقي وشامخ وعالي
وعزك رامي ليوم الساعه
وما دام نحنا ارواحنا معانا
قامات مجدك ننفي ضياعا
يا المتوهطه في شرياننا
ناسك ريدك في أضلاعا
كل ما ينادي نداك حنلبي
مننا ليك السمع الطاعه
ونفضل ننشد فى موالك
تحيا عزيزه وعاليه رفاعه
تحيا عزيزه وعاليه رفاعه
تحيا عزيزه وعاليه رفاعه
وتحيا قصيده لكل موال
و ياها رفاعه شموخ وجلال