رسول الرحمه

رسول الرحمه
بسم الله ياخالق البشر من طين
والصلاه والسلام ليك يالبشير وامين
شافع الامه كافه الطاعو والعاصين
بي كفو الشريف احيا واقام الدين

بي كفو الشريف جمع الجموع من بدري
وبي كفو الشريف فرتك صفوف جيش بدري
مشروح الجبين واسع رحيب الصدري
دا الجاهو الوحي النازل في ليلة القدري


وياريت لو ازور قبرو الحبيب ياريتو
ازيد ليو في الصلاه ومني السلام اديتو
ماكضب أمين ماخوف هو فارق بيتو
سندان العدو بي بصه بقطع خيتو


أعيد سيرتو الحبيب واذكر محاسنو نبيا
اب وشا قمر سامق مكانتو علــــــــــــيا
أفلج فاطرو قط ماردا ليهو هديـــــــــــــه
شوفتك في المنام تشفي العلي والبيــــــــا


ودق باب الحبيب أقري السلام ياطارق
دا الفي مدحو قال رب السماء والطارق
قول في وصفو زيد أوزن وماتكون طارق
كلماتو التقول كيه وعلاج ومطارق


نويت ليه القيام يس أبوك يافاطنه
أحمد مصطفاو سيد الفصاح والراطنه
الهادي الشفيع بي حبو لمً أحاطنا
نبي الرحمه محمود فارقتلك واطاتنا


أسي الوجه مسنوناً خدودو يضون
سايله اطرافو واصوات الحجيج ليو دون
ششن اقدام طويل أحفظ حديثو مدون
ناويلك اجيك كان بحري او كان جوا


وصلنا مدينتو بي حبو الكبير هو جرفنا
لا طريت العقاب لاجبتا سيرتو جرفنا
ودعناهو للنيل النسيمو كرفنا كرفنا
كان داير يجي لكن عليهو حلفنــــا


وقفت قصادو سايلات الدموع في ريدو
الصديق عمر والطاهره شوقنا شديدو
أتنخ علي ذنبي الكبير عن ايـــــدو
أيا كاشف الكرب خفف علي لاتزيدو