* مربعــــات "وبصوت إيمان متوكل" *

الأستاذة/ إيمان متوكل
مربعــــات
مربعات
http://www.2shared.com/audio/ZqRYpExJ/_online.html

ربدت الظروف القاسية قامت جارية
سلت سيفا قوق لا خايفة لا متضارية
تهرد في حشاي وأنا بالصبر مو عارية
ولّعت الغبار لفتت جميع السارية

ضهبان في النفوس حتى الجشع والقدرة
ما طالن كتير علا النجاح والسترة
يفرج الله لي كل الهموم والعسر
يمسع لي أساي مسح البياض للبدرة

قاعدة الكون حداي ما داري بي نيراني
آه يا ناس أبوي أخواني ناس جيراني
بياع الفرح باع الفرح مجاني
دق الباب علي مكتوبة ما يلقاني

مكتوب لي أعيش في الدنيا أشقى أعاني
أعشق أي زول قاسي ولئيم وأناني
يمدحوا فيه الخلق في ريدو يصبح جاني
طلّق يا قليب ما بتهوى زولاً تاني

رصرصت الهموم بستنى أبيع لي حبة
جاني فرح عديل بسراع وما بتخبى
سكنتو في غناي سكن المشيخ للقبة
دسّيتو ومليت إحساس فراغ ومحبة

ويا بخت الولد زولاً عديلاً زيي
ويا بخت الشمس كان نورا بشبه ضيي
يا بخت الزرع لو كان شرب من ريي
عيان بالكرم كان الكرم بيعيي

عرّستَ السكات طلّق كلامي الشين
زغردت الهموم فرح العديل والزين
بشّروا بالشقا والعين تقالد العين
وإن قلت الديار وين تلقى متلها وين

وا زول ما سمع نبشوني قالوا بخيلة
معدومة أصل مجهولة مالي قبيلة
معدومة سرج فيني الشمالى عديلة
كضاب الكلام ما عندي غير قال قيلا

قالوا علي كتير آريتا كان قدامي
كنت حلف قسم قت ليها أحلفي أمامي
إن قصّرت فيك أو جار عليكي كلامي
يتشل اللسان ويتذل بيها مقامي

أنا بت الأصول زينة ومكارم وطيبة
بت عز الرجال عزة وكرامة وهيبة
أتحدى الخلق من الصغير لي أب شيبة
إن زماني يوم أو قال علي العيبة

من بلد الرسول يا زولة أصلاً جينا
سمونا الكنوز إسماً مسمى علينا
جوانا النضيف شايفا الخلق في عنينا
قدام الصفوف في الحارة تجي تلقينا

يوم قسموا الشرف أول بشر أدونا
ويوم قصدوا الكضب قصداً عديييل فطونا
الدين والعلم يا زولة هم رفعونا
رفعونا السما ولي الليلة مااا دلونا

من كل الجهات جاني الوجع وجّعني
بندهلك تعال هوي يا الأصم أسمعني
إن درت الحرب ماف شئ بقيف يردعني
وإن درت السلام ياني البكون المعني

وصمات الشقى والله هردن جلدي
مالك آآآ الحنين هسّع بتوقف ضدي
عند بلد الجفا سايق رويحتي تحدي
وشايقني الطريق ديمة لشقايَ يودي

ما ظنيت تكون كايس شقاي أو ضيقي
وأنا خاتاك أخوي سفاً غطاي وصديقي
لهلبت القليب ولّعتَ فوقو حريقي
خانقاني الظنون ما قادرة أبلع ريقي

وين الخوة وكتين الحبيب يرتدَ
وين القوة وكتين الضراع تتهدَ
الواجعني في الزول البريدو وصد
من سعف الهموم طرزلي توبي مخدة

وكان حالاً مسوّد في الماضي قالوا وقلنا
هسع يا الرجال مالكم بقيتوا متلنا
كت قايلة الرجال بلداً ملانة محنّة
في بلد الرجال كتر الكلام محنّا

ما شاء الله وتبارك _________ بالتوفيق في الجاي إنشاء الله

» *** يا زول جديد "وبصوت إيمان متوكل"***
» *** إحساس "وبصوت المرهفّين عمر محي الدين وإيمان متوكل" ***

*** مربعــــات "وبصوت إيمان متوكل" ***

* مربعــــات "وبصوت إيمان متوكل" *