يابت كل الحواس
عمر مصطفي عبدالله
يا بت يا كل الحس والشوف
يا ملكلكة عصب الروح انغام
يا فاضحة وقارالصمت حروف
ومرتِّبة حسنك فيني كلام
لمتين اهواك انسام وطيوف
وانا ليلي في موج انسامك عام
واعوام في الريدةبقاسي ظروف
واليوم في عُرف الريد اعوام
مالك متباخلة عليّ بالريد
عارفاني وراك مهدود الحيل
و شايفك بتونسي وحشة نجمة
وتمشطي مرة ضفاير الليل
ناسياني تقول..
ما ياني الزول
الراح في دربك قلبو شليل
الزول الشايلك باقي فرح
في عتمة سكك الهم قنديل
******
مالك يا بت
لا حس لا شوف
مين الداسيك مننا حاجبك
دي عيون ريدتنا قدُر ما تشوف
ما بتعلا في يوم تب علي حاجبك
شايفك تتسكعي في جواي
وانا ساي
لي حال الريد سايبك
هل يعني
بعجبك حالي البي
ام ساكت يعني غرورك عاجبك
********
يا بت
يا فاتحة الدهشة مسام
ومتسربلة
نفس الغنية رحيق
انا جايي عليك بي باقي الروح
لو ما بس عايق صدك يعيق
اهديكي براح
الكون افراح
يا فاتحة قصادي الوحشة طريق
انا راضي امِش في دربها لو
يرضن عينيك يبقولي رفيق
يا بت يا كل الحس والشوف
يا ملكلكة عصب الروح انغام
يا فاضحة وقار الصمت حروف
ومرتبة حسنك فيني كلام
الأحد أكتوبر 08, 2017 10:30 am من طرف TigerAd
اليومية
موضوع: يابت كل الحواس 
