يـلا مـعـاي

موضوع: يـلا مـعـاي السبت أغسطس 25, 2012 2:35 pm

يلا معاي
محمد المهندس

يلا معاي
في الزيفة , وفي المطرة
وفي حَر زي غرامي شديد
نسافر في في عوالِم ريد
ولو كانت دروب خطِرة
نشيل الريد وِسادة وزاد
عشان ناسنا الهِناك تطرا
ريد موصوم علي جبينا
ومرسوم فينا بالفطرة

* * * * * *
يلا معاي
هوي وعادة
أصلو الناس دي معتادة
تشوف الحب طقوس صعبة
طقوس ما بتحَمل التغيير
ولو كتبوها في عيادة

* * * * * *
يلا معاي
نعيش اللحظة والاحساس
نبقي قلوب نقية بهية زي الماس
ننسي عُيون تراقبنا
مُناها تكون بروعتنا
أصلو الحب بدوم لو فيو
قلِب صافي وحبيب ونَاس

* * * * * *
يلا معاي
نخلي الدنيا تِتعلم
نخلي الكان يخاف يكتب مشاعرو الليلة يتكلم
نخلي الحب يمازج الروح مع الخاطر
ودا العايز يعيش مرتاح
نوريهو الطريقة الصاح
ونجبر ليه بالخاطر
والخايف كلام الناس ,, يقيف حدو
معانا انحنا لا يجازف ,, ولا يخاطر

* * * * * *
يلا معاي
نرسم بيتنا بالافراح
نخططو بي قلِب ابيض
ونبنيو بي ضمير مرتاح
نشطِبو بي بالرضا الدايم
ونفرشو بالهوا النضاح
ونزرع فيه احلامنا
ونغرسو بالمحبة سماح
نكتب لافتة في بابنا
(منزل مبني بالألفة ومزين بالحنين الصاح)

يلا معاي