بجيني تعذر الارسال

بجيني تعذر الإرسال
ايمان متوكل


وكل ما القط شبكة الريد تقول لي المحنة تعال..
على ريدي الطفح جوايا إنت تعال ..
على صدق القصيد في نضمي إنت تعال ..
ندق دلوكة الفرحة ونميل للفرح شبال ..
نفرهد فوق قصور الريد نفج غيم البكى الهطال ..
نساسق فوق شوارع الكلمة شان نوصل لحس يتقال ..
اتاريهو الوجع في جوفي
زود خوفي
تب ماراعى يوم لظروفي
هذي الدنيا مي معروفي
مادام العشق كتال ..
وكل ماتطش شبكة الريد ازيدك بالمحنة وصال ..
ولافترن رجول البوح مشاوير التلاقي طوال ..
ولامرقن بنات الروح ولالقن الموات قبال ..
إذن ممكن تعود في الحال ؟ ..
قبل عشم الليالي يخيب وماخابن وراك امال ..
قبل شمس الوطن ماتغيب ويتجهجه وراها اجيال ..
قبل ماذبذبات الصد تقطع شبكة الإرسال ..
تعال نوصل عيون الشوق بعد قالوا التلاقي محال
بجيني تعذر الإرسال
وكل ما القط شبكة الريد تقول لي المحنة تعال ..