الــــــــــــــدردره

أناحسيتك

انا حسيتك يوم النيل بيقالد المطره

وتصبح منو وفيهو ويمشو

لابتحس بي غير الدهشه

ولا بتهش افكارك سرحه

وانا بشتاقك

انا بشتاقك غنوه وطيف

وحنين دفاق

وقلبي يبوح بالنور اشواق

ورقراق عينيك لي عني الضل

وعيان ودواي شوفتك

وبلت ريقي العطشان صورتك

بتتواري تبين وتروح

هو اريتو البوح لو ليكا يفيد

انا الجردت حروف الريد من الكلمات

خليتا تسوط وتجوط

ماتفهم شي

لانك سطت كياني عصير ليمون

وانا ما مضمون

أمكن أفوت

او حتي اموت في ريدك موت

خمسين خمسين

النص القال عادي بخليك

والتاني محال يفوت عينيك

وانا بين الاتنين

متشلهت جد

وبيني وبينك في السيف الحد

وحدك ماليهو حدود

وانا كان روحت بعود

وارميها عصاتك

ما عصاتك عود

منخور ومبهدل

بس ريحتو بخور

وانا جمب الخور

قاعد

وتخور قواي

وجواي كلام بالكوم

كان عدت بكون في شوفا خفيف

ويبقي هناك ميزاني طفيف

وطفيتا سجارة احزاني

علي حجر الاحلام الكان جمبي

طيب ياصخره تقيله ومابتتشال

لو قلت تقيف

تقدر تتصور كيف حا يكون الحال

والله محال

ولا أقول ليك

مافارق شي

واتلخبتً

ومشيت خبتً

علي بابك يارب الريد

أنا ما عارف

لي سيرتو اعيد؟

ولا أتناساو؟

يازول ارجع

ما تزيدو أساو

ووسواس الريد

بيسل الروح

أرجع ليو بوح

واشرح واسرح

واسرح واشرح



وشريت احزاني

علي باب الريد

وعلي بال ماتنشف

اتبردت علي بحور

الدمع السال منك

ومني ومنك

ضُراب أقدار الريد

وبيني وبينك

انا راجع ليك

ونشفت احزاني واحزانك جفت

وارتدت حروف الشوق بتغازل فيك

وكلماتك صدت

وكملت احتمالات الحساب

ومراكبك لي مرساي رجعت عدت