بين البحبو عتاب؟

بين البحبو عتاب؟






بيناتنا يعني كرامة.. و بين البحبو عتاب؟

كم ياما خنت و ياما..بتسامحو الأحباب

....................................................

دايما علي تغلط..و أنا كنت بغفر ليك

ولا يوم رميت اللوم..ما برضى لوم عينيك

و أنا عارف إنو الريد..زي السحابة بجيك

من غير تقول بهواك..أنا قلبي يشعر بيك

..................................................

مادام بقوا الأحباب .. في الريدة زول واحد

ليه الكرامة تكون..لقلوبنا بتباعد

أنا بي هواك رضيان..لي مر جفاك رايد

عارفك حترجع لي.. و صد الحبيب وارد

...................................................

بتعد علي غلطي .. وتحسب علي الفات

مع إني ما بقدر..في يوم أعيد المات

ليه خاتي بيناتنا..لوم السنين عقبات

و أنا حبي ليك أكبر .. من لومي ليك بالذات

...................................................

أنسى الزعل بالله .. خلينا في ريدنا

خلينا أحلى إتنين..بالحب مواعيدنا

و بيناتنا طفل الريد .. ربينا بي إيدنا

نحلم نغني عليو.. الليلة يوم عيدنا



محمود الجيلي