ريـــــــــــحة الواطــــــه

ريحة الواطه




ريحة الواطه

الطوريه التاكله و نايمه على واطاتا

ريحة كل خطوات الحله وكت تتصابق لاحقه صلاتا

دي ريحة الوطن اللا بتقهقر لا يوم طاطا

. . .

أنا يا سوداني مستف ريدك

شايل جوايا جروفك

دفقت في الأعماق توتيلك

عاشق ناسك وارضك انتا

وجوه دمانا موهط نيلك

رغم آلامك يا سوداننا

وفترك وحزنك من تفصيلك

لسه اولادك نحنا آيابا

ولسع بالآمال بنجيلك

كان ضاقت يا وطن الدنيا

عين انسان العين بتشيلك

نحنا نفارق الدنيا طرابا

وما يتدمدم ضو قنديلك

واوعاك تزعل يا السودان يا ابونا الراجل

أوعاك تزعل

كانت شقت طاعتك أبنوسه

وكان طقت عيدانا السوسه

وخطت بينك و بينا فواصل

وانقلعت من لحمك باطل

لسه كتار في الدنيا اولادك يا السودان يا ابونا الراجل

لسه كتار في الدنيا اولادك

رغم البحصل ورغم الحاصل

رغما" عن عينين اليانكي

أيا ابو السره

رغما" عن الركا وفرا

وكل القايم فوقك

وضلل بره

لو رجافك حقب وسافر

فاضل مره

ولو أنناس الفقر اتعزز

عندك عجوة فال و مسره

و اوعاك تزعل ماك متفصل

يكفي وجودك بين ارواحنا وفي احساسا

ماك متفصل لسه موحد

كل القصه كلام وسياسه

لو قسمنا الواطه وفتنا

فكيف الناس بتفارق ناسا

ولسع شول والشول أولادك

حتى إذاما اتغير رسمك وبى إيدين الجور اتواسا

كل متلفح شالو وسايق شن بتفصل

من متحزم حارت وعازق شن بتفصل

والمسكين الكايس الكسره

والبتملح زادا الحسره

والقاصدين أشغال ومدارس

والطاردين في الصي البكره

والحارسين سيقان البفره

ما بتتفصل بلد الدخري الراجي الحوبه

بلد الناس العامره قلوبا

حس جراري سيوف ولواري

بلد المك الما متضاري معا الصوفيه اهل اللالوبه

لو راح ليك الوطن الواحد

كوس تلقاو في حلقة نوبه

ولو بتكوس الوطن الواحد لساو ساكن رقصة نوبه


فيا السودان يا ابونا الأول

ما بتتفصل

ما بتتفصل دام النيل جواكا موصل

ما بنتفصل دام الدم الفينا موحد

دام اللون البيكا مأصل

دي كلها

ارهاصات مزروعه

تتخطط كبد بى خنجر وتبقا تقاسيمك مشلوعه

بس دي الأرض البور ما انتا

انتا الشمس الفينا طلوعا

انتا الأهل العيد واللمه

بينا مواقيتك مرفوعه

وانتا حبيبه

وانتا الأم الروحا رحيبه

وانتا الأب والعم والشارع

وانتا الفارع وسط الريبه


أيه يا دنيا الوطن الواحد

غير أشخاص بتعاطو الطيبه

حتى إذا ما الخرط اتلاشت

لسه الناس من جوه قريبه

يكفي تلم الناس ضلاله

أو ضل كرنك حوشو زريبه

. . . .

ما كم خط في ورقه وطننا

وطنا" بينا أنحنا وناسنا

الجافانا وفارق سربو

من جوانا بنزلو فاسنا

وكل مغلوب مدهوس في اللمه

بقعد تاج بى فوق لى راسنا

واجب يوم الباعك يبخس

ونشرب راحة البال بى كاسنا

وترقص عزه على أنفاسنا

وتشرق شمس الوحده الغابت

مليون ميل نضحك بالقاسنا

واجب يوم الدنيا تغيم

ويرجع ساسنا يقالد ساسنا






هتان حمد النيل