انا فهمي للريد مختلف ...

انا فهمي للريد مختلف ...


بل خوف غناك

الخنقة بتجيب النفس ..

تعب المشاوير الحنان صد من

مشي الريده وعبس ..

من هضلمة صدق الحواس

ما خلى لي بعدك قبس ..

لوكان عديل هادا السكات

كان الكلام من بؤرتك جاك واقتبس ..

لكن خلاص بان كل شي

وما فاضله ليك غير ذكرى بس ..

ذكرى بتجابد في القعاد

انا هد حيل ريدي السهاد

اتحملو

وجواكا لو في اتحملو

ماتهملو

مادام صبر ليك في البعاد

اصبر عليو في القاسيه عاد

كل المصارين زي بعض

وبتشاكلن

وانا فهمي للريد مختلف ...

إنك تجوط لامن تجوط كل الحواس الفي جواي

ولامن تشوفني براك تروق

وانا وانت مش نشبه بعض

انا وانت قلبين في قلب

واوردتي يوم شافت هواك

فضت دماها من الدرب

شان يمشي فيني وريد وريد

وما احس بيو فيي منسرب

انا حكرتك

وتلاقح الماضي العفيف الشايلو جوات ذكرتك

انا بكرتك

وحتالت الوجع الحفيف الشاقي مغرب حلتك

انا حلتك

لكني مازينت ليك وإت ماشي إحساس طلتك

انا همك المابنطرد ..

وانا كل بضاعات السعاده الما بتتمنى الجرد..

وانا نغمة العزف المجيه ومنفرد ..

وإت في الحكاوي قدر ادسك تنسرد ..

إت يم عيوني المافي زول منك ورد ..

إت شافتك غيمات رضاي شرت وقامت ترتعد ..

إت حاجة القول للسكات لامن يكون مارق عليك ما مستعد ..

وإت لو عرفت بإني إت

ماكان رضيت سوقت خطاك وكتين تسافر وتبتعد ..




ايمان متوكل