( نص قصصي ) يوميات امرأة كادحة

حلفن بنياتي الصغار
ما يقالدن الضيق والجبر .
غسلت صبري نشفت زيييين
جريت همومي علي التكل
ولعت نيراني العلي
بقت ولا نجض الفتر
عايسني لا متين يا صباح
ما كفاية عايسني الفقر
هم الوليدات والملاح
والدارة والضيق والعمر
جاني المغبش يمة كيف
دايرلي قرشين للسفر
خانقاني يا يمة الظروف
حاحيتة كل ما الضيق يمر
ما قدرت اقلد هم شقاك
يا وليدي هم بعدك امر
كفتني يا ولدي الزمن
لا تزيد علي ناري الجمر
يا والدة ماك خابرة العلي
يا غالية بس شيلي الصبر
باكر بجيك مالك الهنا
واغنيكي عن حال الفقر
اعفيلي يا صابرة البعاد
يا وليدي من العين دقر
بس كت بدورك في حداي
تشرق علي الارزاق فجر
فات الاصم من دون رجوع
ذاد نار شقاي والدنيا حر

اها بعد ما الضيق انزرد
والحالة صبحت ما بتسر
تكلت همي علي الجراح
عبيتلي كسري مع ملاح
ومرقت انبح للصباح
ها ناس ندهلي الهم وصاح
ها ناس بدور اسقي المراح
والناس ولا هماها شي
تضحك ولا خابرة العلي
والهم جواي ما بختشي
شقيش نشفت من الشمس
هرد سفنجاتي المشي
والحلة اتقل من رضاي
تاريني ما بايعالي شي
والهم كبس ...
زارني الفلس
وانا راجعة اعلف في شقاي
جوني البنيات ذي حرس
يا يمة وين فتينا وين
ماك خابرة انو الجوع مقص
والزيت نقص
والدمعة ختافة فرص
زارتنا يا يمة بقفاك
لوت مصارين المغس
تكلت همي علي البيوت
ومضغت احساسي الجواي
ضميت بنيات القصيد
بعدن ولا وقفن حداي
وضحكت حد زارني الشرق
اها جيت عليكن يا مناي
ودخلت غتغت الهموم
ورميتة ها الزايلة بقفاي
كان باكر اقدر المها
وانا ضايقة خوفة وسمها
لكني حامداهو الكريم
قادر يخاطب نمها
قادر يقلب ها القلوب
والعافية تاني اضمها
واصبح عليو على الف خير .......

النص رااااااااااااااااااااااااااااائع والكاتب اروع سلمت اناملك